Syifa imut, hatena bungah. Kapanasaran salila ieu kajawab kabeh. Salila opat belas taun, aya kanyeri nu disidem kumanehna. Poe tadi, kabeh patanyaan hate kabayar.
Arya, geuning manehna ge inget ka kuring.
Bray, alam dunya karasana leuwih caang, katumbiri leuwih endah, galindeng tembang ngalem manehna.
-0-
Opat belas taun katukang.
Syif, Arya juga minta ma’af sama kamu. Karena kesalahan itu bukan kesalahan kamu saja. Arya.
Syifa narima salambar surat ti leungeun Lely, babaturan sakelas Arya. Ngaliwatan Lely, Arya nitipkeun pesenna, Arya teu bisa nepungan Syifa deui.
Nyeri, kuciwa ngahiji dina dadana. Hayang ceurik, hayang ngajerit. Naha Arya teu ngaragap hate manehna?. Surat nu katampa, surat panganggeusan lakon maranehna.
-0-
Bubulanan Syifa jeung Arya babarengan, deukeut sok sanajan euweuh basa nu nyatakeun yen maranehna papacangan. Duka kunaon alesanna, Arya lalaunan ngajauhan manehna, mindeng ngabalieur mun tepung jeung manehna.
Nu diinget ku Syifa, kasahalan manehna pedah loba nyaram Arya. Syifa ngarasa Arya mimiti kabawa ku pergaulan kurang hade. Niat Syifa ngingetan, salaku jalma nu deukeut nu deudeuh ka Arya, Syifa ngarasa kudu ngelingan. Jeung deuih meureun, pedah Syifa mah leuwih kolot umurna batan Arya.
Ari Arya, ma’lum keur masa-masana, darah muda ceuk Rhoma Irama mah, ngarasa naon nu dilakonan kumanehna euweuh salahna. Kenakalan anak muda nu lumrah keneh.
-0-
Salila opat belas taun, unggal panggih jeung babaturan sakola Syifa teu weleh nananyakeun ayana Arya. Boh ka babaturan sakolana atawa ka adi kelasna nu saangkatan jeung Arya. Lebeng, euweuh nu arapaleun.
Hiji mangsa, Aam babaturan sakola Syifa jeung Arya nganjang ka imah Syifa bari mawa beja cenah mah Arya gawe di Batam. Ngan, kusabab Aam mah balik kalembur teu balik deui ka ditu, Aam teu boga informasi satuluyna.
-0-
Sababaraha poe katukang, waktu Syifa keur muka Face book. Aya notification ti Face book,
Arya Rangga posted in Kumpulan anak Jadoel.
Kumpulan anak jadul teh grup nu dijieun ku Syifa dina Face book, ngahaja keur babaturan SMA manehna.
Syifa ningali wall post kiriman Arya Rangga.
Nepangkeun, abdi angkatan taun 99. Salam kenal wae kasadayana.
Ditempo poto profilna, lain geuning lain Arya Rangga nu diteangan, beda pisan ieu mah. Jigana mah Arya Rangga nu saurang deui, gerentes Syifa.
-0-
Asa kagunturan madu, kaurugan menyan bodas, bungah pisan Syifa poe ieu, geuning Arya nu aya dina Face book teh Arya nu salila ieu diteangan ku manehna. Arya nu baheula ngajak manehna nganjang ka imah kolotna.
Pon kitu deui Arya liwat inbok Syifa, Arya ngebrehkeun rasa nu sarua sonona. Sono antara dua sobat nu lawas teu panggih. Syifa bungah, kusabab dina Chating Arya wakca, yen manehna baheula kungsi bogoh kamanehna.
“Arya, kengeng teu abdi naros?”
“Mangga, nanging kade, tong serius nya, hehe, sok lajengkeun”
“Kahiji, rumaos kantos seneng teu ka abdi?”
“Hehehehehe, aya aya wae. Penting kitu?”
“Hemh ... tos atuh, teu kedah wae lah”
“Muhun atuh Syif, piraku hilap. Lajengkeun...”
“Oh ... hehe .. alhamdulillah, manawi teh abdi nu geer kapungkur teh”
“Duh, Gusti ... ieu mah nya”
Syifa imut, hatena bungah. Kapanasaran salila ieu kajawab kabeh sok sanajan ukur hiji patanyaan. Salila opat belas taun, aya kanyeri nu disidem kumanehna. Poe tadi, kabeh patanyaan hate kabayar.
Bray ... bray .. bray .. puluhan kali lipet dunya karasana leuwih caang. Syifa meunang Jawaban pikeun kapanasaran salila opat belas taun hate manehna.
“Theng kyu pesbuuuuuuk .......” tulis Syifa dina Statusna.
