Balik

“Sok, balik deui, moal? Pokona, ceuk aing balik, kudu balik deui!” Ema sesentak. Leungeunna teu eureun muter-muter pamuteran jam. Haben diputer–puter ka kénca. “Ma, atos atuh, Ma ..., ieu abdi aya di payuneun Ema. Abdi gé sono ka Ema,” cekéng téh bari nyuuh kana lahunanana. Ema teu maliré. Kalan-kalan, Ema ngusapan éta jam. “Ma, hapunten abdi, sanés abdi badé téga,” pok téh deui. Saheulaanan Ema cicing, jam dindingna ditangkeup pageuh. “Eulis, naha anjeun bet miheulaan Ema? Balik ka dieu atuh, Lis. Balik deui ka Ema. Ema sono ...,” sora Ema dareuda. Socana carinakdak, neuteup kosong lalangit kamar.