Estu anteng nempokeun indungna nu keur nyeuseuhan di imah Ceu Eha. Sasakali, indungna ngelap kesang nu nyurulung tina tarangna. Calana jeans tilu, simbut hiji geus rengse. Kari dua jolang papakean deui mah moal lila meureun. Sajam, dua jam, indungna can beres keneh nyeuseuhan. Estu mimiti guling gasahan, komo waktu Ceu Eha datang bari mawa dua gembolan setrikaeun. “Mah, hayu uih. Wios teu emam oge dinten ayeuna mah. Urang milari padamelan sanes. Ulah didieu”. Indungna anteng moe-moekeun baju, teu ngadenge pamenta dirina. “Mah, hayu uih, mamah, hayu uih”. Indungna ukur ngajak imut, bari leungeunna teu eureun ngaleot. “Sakedap deui nya bageur, ke urang meser sambel goreng endog karesep Estu” “Mamah, kamari apa sareng ceu Eha paduduaan dikamar urang, waktos mamah nuju nyeuseuhan acuk didieu”Gerentes Estu.
